TRÁTASE DUNHA AVESPA PARASITOIDE

Científicos do grupo de xenética e mellora de brásicas da Misión Biolóxica de Galicia do CSIC descubriron na avespa parasitoide Diadegma fenestrale un inimigo natural para combater a couza da col, da que o control por medio químicos ten un elevado custo económico.

No marco dunha investigación iniciada hai dez anos sobre pragas e enfermidades das brásicas (berzas, repolos, coles ou grelos), os especialistas do CSIC determinaron que a citada avespa deposita os seus ovos no corpo das ourugas da couza, que rematan por morrer, informou o centro nun comunicado.

Os científicos descubriron a existencia de cinco especies de avespas que desempeñan o papel do control biolóxico da couza e, entre elas, destacan pola abundancia e eficacia a Diadegma fenestrale, que acadou un nivel de parasitismo (número de parasitos por ouruga recollida) do 78 % na berza e do 82 % no repolo.

A couza da col está presente en tódolos países onde se cultivan brásicas, ten unha boa adaptabilidade a distintas condicións ambientais, gran capacidade migratoria e moitas xeracións por ano, polo que causa salientables pérdidas económicas.

Os investigadores galegos rexeitan o uso de pesticidas, un método "bastante infructuoso" debido á resistencia desenvolvida pola couza á maioría dos compostos químicos.