SEGUNDO UN ESTUDO DA UNIVERSIDADE DE VIGO

Unha tese doutoral desenvolvida polo investigador Rubén Domínguez, da Universidade de Vigo, conclúe que o porco celta alimentado a base de castañas posúe un maior valor nutricional.

No marco dun proxecto da área de Tecnoloxías dos Alimentos do campus de Ourense, o investigador propúxose profundizar na influencia da alimentación a base de castañas na calidade da carne do porco celta, segundo informou nunha nota da Universidade de Vigo.

Á vista dos resultados desta tese, podería establecerse un paralelismo entre os porcos celtas alimentados con castañas e os apreciados ibéricos de bellota ou "pata negra".

A tese, presentada na Facultade de Ciencias do Campus de Ourense, desenvolveuse dentro dun proxecto de investigación de tres anos de duración financiado polo Plan Nacional de I+D+i.

Durante dezaseis meses, cebouse en réxime semiextensivo a 48 porcos -machos e femias castrados- para coñecer a influencia dunha alimentación tradicional, así coma a inclusión da castaña na dieta de finalización, especialmente sobre os contidos en ácidos graxos, colesterol e retinol da carne.

Menos colesterol

Na fase final da investigación observouse que os porcos alimentados con castañas presentan máis graxa intramuscular, o que afecta de xeito positivo á calidade sensorial dos produtos cárnicos, disminuíndo o contido en colesterol.

Ademais, os que comen castañas teñen máis ácidos graxos omega tres e ácido oleico.

Pola contra, os alimentados con pienso presentaban un maior contido de colesterol e retinol.