NUNHA ENTREVISTA CONCEDIDA A EFE

A conselleira de Medio Rural e do Mar, Rosa Quintana, expresou a súa esperanza de que na Comisión Europea "sexan valentes" e realmente aborden unha "auténtica reforma" da política pesqueira común (PPC) e Galicia, coma "potencia pesqueira", poda manter este sector.

Nunha entrevista concedida a EFE, Quintana sostén que, na reforma da PPC, que se aprobará en 2013, Galicia precisa que "determinados principios malentendidos que foron aplicados no momento de entrar España na UE sexan revisados e nos permitan que podamos ter unhas posibilidades de pesca acordes á frota que temos".

A responsable galega de Pesca sinalou que Galicia "fixo tódolos deberes" postos pola UE, coma a adecuación da capacidade extractiva á existencia de recursos, e foi a primeira en falar de zonas de reserva, vedas, e tamaños mínimos.

Resaltou así mesmo que Galicia foi capaz de defender unha definición de frota artesanal para que teña un tratamento diferenciado, e tamén do marisqueo a pé, actividade que non se desenvolve en prácticamente ningún outro país e afecta a 4.000 mariscadoras.

Polo que respecta á reforma da Politica Agraria Común, Quintana apuntou que Galicia quere "seguir defendendo un sector agrogandeiro forte", polo que rexeita que as axudas dos novos fondos se orienten unicamente pola superficie, o que "prexudicaría gravemente a Galicia", postura na que coincide coas comunidades da cornixa cantábrica.

Valorou que nesta reforma se acadase unha postura unitaria das Comunidades e Ministerio.

Sector lácteo

Con respecto á crise de prezos do sector lácteo, resaltou a disparidade que se rexistra nos custos de producción e o prezo do produto, consecuencia ao seu xuízo da "inacción forte que houbo nos últimos anos a nivel de Estado", aínda que agregou que agora hai un compromiso do Ministerio que se vén de materializar no "paquete lácteo" aprobado polo Goberno.

Dende agora, engadiu, as organizacións de produtores teñen "a posibilidade de ser moito máis fortes" á hora de negociar.

"Creo que se están establecendo as ferramentas administrativas necesarias para que este sector avance", resumiu, en referencia tamén á Lei da cadea alimentaria que ultima o Ministerio, que "dará transparencia" ao sector.