CON 82 ACTIVIDADES DIFERENTES

Un total de 37 entidades e empresas ofrecen un cartel de 82 actividades diferentes de turismo mariñeiro, das que vinte están protagonizadas directamente por profesionais do mar.

Así figura na Guía de Turismo Mariñeiro, editada pola Xunta en galego, castelán e inglés, e que recolle toda a información actualizada sobre entidades que en Galicia realizan actividades deste tipo.

A primeira parte da guía describe as actividades que se poden realizar en terra firme, aínda que vinculadas ao traballo e a cultura da Galicia mariñeira, como percorrer bancos marisqueiros, coñecer estaleiros artesanais e oficios como o das redeiras ou a construción de nasas.

Tamén se poden visitar lonxas ou fábricas de conservas, vivir a vida dos portos pesqueiros, degustar sabores mariñeiros en obradoiros de cociña ou interpretar tradición e traballo en museos relacionados co mar.

Outra parte da guía ofrece aos turistas a posibilidade de ir ao mar, acompañados de mariñeiros, nunha xornada de pesca, realizando algunha ruta en embarcacións tradicionais ou turísticas; desembarcar nunha batea para ver o cultivo do mexillón; avistar aves mariñas ou practicar pesca.

Profesionais do mar implicados

Na guía figura que do total de empresas que ofrecen actividades na costa, vinte corresponden a profesionais do mar: mariscadoras, redeiras, carpinteiros de ribeira, naseiros, mexilloeiros, recolledores de algas, mariñeiros ou vendedores das lonxas.

Na actualidade, xa existen cinco confrarías de mariñeiros que realizan actividades de turismo mariñeiro: Laxe, Fisterra, O Pindo, Lira e Portosín.Turismo Mariñeiro de Galicia, destaca a Xunta na súa nota, é un "novo" produto turístico que se basea na autenticidade "e singularidade" da cultura marítima galega, en contacto coa natureza, o mar e os mariñeiros.