SEGUNDO OS ÚLTIMOS DATOS DE ANFACO

As exportacións de preparados e conservas de peixes e mariscos medraron o 12 % en valor entre xaneiro e xullo, con respecto ao mesmo periodo do ano anterior, cunha facturación de máis de 420 millóns de euros.

Así o reflicten os datos de Aduanas divulgados pola Asociación Nacional de Fabricantes de Conservas (Anfaco) de Peixe e Marisco.

Este foi o capítulo que máis medrou dentro dos produtos do mar e a acuicultura, que en conxunto facturaron máis de 1.660 millóns de euros nos primeiros sete meses do ano, o 7,62 % máis, malia unha baixada en volume do 4,83 %, ata 550.035 toneladas.

A segunda maior subida en valor correspondeu ao peixe conxelado, do 11,81 %, con máis de 453 millóns de euros, mentres que para o peixe fresco foi do 6,36 %, con máis de 207 millóns.

As vendas no exterior de moluscos creceron tamén un 3,25 % ata os 275 millóns de euros, igual que as de crustáceos, cun 8,51 % máis ata 120 millóns.

Dentro das conservas, Anfaco salienta que o atún mantense coma o "produto estrela", co 70 % do valor total exportado, por riba dos 297 millóns de euros no periodo citado, preto dun 13 % máis interanual.

Subliña ademais o incremento nos envíos de cabala en conserva, cun 72 % máis en volume e un 54 % máis en valor, ata superar os 4,5 millóns de euros.

Pola contra, caeron as exportacións de mexillón en conserva, cun 33 % menos e algo máis de tres millóns de euros facturados.

Destinos

Por destinos, Europa mantense coma o principal mercado, con 387,3 millóns de euros e unha suba nas exportacións de preto do 12 %, mentres que África é a área xeográfica que experimenta un maior crecemento, do 37 % ata un total de 14,2 millóns de euros.

Italia e Francia encabezan a lista de clientes das conservas españolas, con 166,7 e 92,8 millóns respectivamente, seguidas de Portugal, con 44,9 millóns, e Alemania, con 20,9 millóns.